മൂന്ന് ലക്ഷം രൂപ വിലവരുന്ന സവാള മോഷ്ടിച്ച മൂന്ന് പേർ പോലീസ് പിടിയിൽ -

8,000 കിലോഗ്രാം സവാള മോഷ്ടിച്ച മൂന്ന് പേർ പോലീസ് പിടിയിൽ. വിപണിയിൽ മൂന്ന് ലക്ഷം രൂപ വിലവരുന്ന സവാളയാണ് ഇവർ മോഷ്ടിച്ചത്.കർഷകൻ സാബിർഹുസൈൻ ഷെർസിയ, വ്യാപാരി ജാബിർ ബാദി, ഡ്രൈവറും കർഷകനുമായ നസ്റുദ്ദീൻ ബാദി എന്നിവരാണ് വാങ്കനീർ സിറ്റി പൊലീസിൻറെ പിടിയിലായത്. പ്രതികളിൽ നിന്ന് 3.11 ലക്ഷം രൂപയും 1600 രൂപ വിലവരുന്ന 40 കിലോ സവാളയും, മൂന്ന് ലക്ഷം രൂപ വിലവരുന്ന ട്രക്കും പൊലീസ് പിടിച്ചെടുത്തിട്ടുണ്ട്.

രഹസ്യവിവരത്തെത്തുടർന്നാണ് പൊലീസ് പരിശോധന നടത്തിയത്. മോഷ്ടിച്ച സവാള വിൽക്കാൻ പോകുകയായിരുന്ന പ്രതികളെ വാങ്കനീർ അമർസർ ക്രോസിന് സമീപം വെച്ചാണു പോലീസ് പിടികൂടിയത്.ചോദ്യം ചെയ്യലിൽ, സവാള മോഷ്ടിച്ചതായും വിറ്റതായും പ്രതികൾ കുറ്റസമ്മതം നടത്തിയിട്ടുണ്ട്. 35 വയസുള്ള ഇമ്രാൻ ഭോരാനിയ എന്ന കർഷകൻ മറ്റൊരാളിൽ നിന്ന് വാടകയ്ക്ക് എടുത്ത ഗോഡൌണിൽ സൂക്ഷിച്ച് വച്ച സവാളയാണ് മോഷണം പോയത്. ഒക്ടോബർ 5-ന് സവാള വിൽക്കാനായി എത്തുമ്പോഴാണ് മോഷണ വിവരം മനസിലായത്. ഇതോടെയാണ് ഇയാൾ പൊലീസിനെ സമീപിച്ചത്.