സംസ്ഥാന സ്‌കൂൾ കായിക മേള ദീപശിഖയ്ക്ക് ജില്ലയിൽ സ്വീകരണം നൽകി
നവംബർ നാല് മുതൽ 11 വരെ എറണാകുളത്ത് നടക്കുന്ന സംസ്ഥാന സ്‌കൂൾ കായികമേളയിലേക്കുള്ള ദീപശിഖാ പ്രയാണത്തിന് കണ്ണൂർ ജില്ലയിൽ വിവിധ കേന്ദ്രങ്ങളിൽ സ്വീകരണം നൽകി. കാസർകോട് നിന്നാരംഭിച്ച ദീപശിഖാ പ്രയാണത്തെ രാവിലെ ജില്ലാ അതിർത്തിയായ കരിവെള്ളൂരിൽ സ്വീകരിച്ച് ആനയിച്ചു. തുടർന്ന് തളിപ്പറമ്പ് മന്ന സീതി സാഹിബ് എച്ച്എസ്എസിന് സമീപം നൽകിയ സ്വീകരണത്തിൽ ജില്ലാ പഞ്ചായത്ത് സ്ഥിരം സമിതി ചെയർപേഴ്‌സൻ അഡ്വ. കെ കെ രത്‌നകുമാരി, തളിപ്പറമ്പ് മുനിസിപ്പൽ ചെയർപേഴ്‌സൻ മുർഷിദ കൊങ്ങായി, ശ്രീകണ്ഠപുരം ജിഎച്ച്എസ്എസിൽ അഡ്വ. സജീവ് ജോസഫ് എംഎൽഎ, ശ്രീകണ്ഠപുരം നഗരസഭ ചെയർപേഴ്‌സൻ ഡോ. കെ വി ഫിലോമിന എന്നിവർ പങ്കെടുത്തു. കൊട്ടിയൂർ ഐജെഎം എച്ച്എസ്എസിലും സ്വീകരണം നൽകി. തുടർന്ന് വയനാട് ജില്ലയിലേക്ക് കടന്നു.
ഹയർ സെക്കൻഡറി റീജ്യനൽ ഡിഡി ആർ രാജേഷ്, ഡയറ്റ് പ്രിൻസിപ്പൽ വി വി പ്രേംരാജൻ, വിഎച്ച്എസ് അസി. ഡയറക്ടർ ഉദയകുമാരി, സമഗ്രശിക്ഷാ കേരളം ഡിപിസി ഇസി വിനോദ്, വിദ്യാകിരണം ജില്ലാ കോ ഓർഡിനേറ്റർ സുധീർ കെസി, ഡിഇഒമാർ, എഇഒമാർ, ബിപിസിമാർ എന്നിവർ ദീപശിഖാ പ്രയാണത്തെ അനുഗമിച്ചു.
വിവിധ സ്‌കൂളുകളിൽ പ്രിൻസിപ്പൽമാർ, ഹെഡ്മാസ്റ്റർമാർ, വിദ്യാർഥികൾ, അധ്യാപകർ, ജനപ്രതിനിധികൾ, പിടിഎ, മദർ പിടിഎ പ്രസിഡൻറുമാർ തുടങ്ങിയവർ ദീപശിഖയ്ക്ക് ആശീർവാദം അർപ്പിച്ചു.
About The Author
