വിവിധ മേഖലകളില്‍ അറിയിപ്പ്/ സീറ്റ് ഒഴിവ്/ അഭിമുഖം/ അപേക്ഷ/ നിയമനം/ ലേലം/ ക്വട്ടേഷന്‍

പഴയങ്ങാടി താലൂക്ക് ആശുപത്രി സ്റ്റാഫ് ക്വാർട്ടേഴ്‌സ്, മാട്ടൂൽ സിഎച്ച്‌സി
കുടുംബാരോഗ്യ കേന്ദ്രമായി ഉയർത്തൽ ഉദ്ഘാടനം ഇന്ന് പഴയങ്ങാടി താലൂക്ക് ആശുപത്രിയിൽ പുതുതായി നിർമ്മിച്ച സ്റ്റാഫ് ക്വാർട്ടേഴ്‌സിന്റെയും മാട്ടുൽ സാമൂഹികാരോഗ്യ കേന്ദ്രത്തെ ബ്ലോക്ക് കുടുംബാരോഗ്യ കേന്ദ്രമായി ഉയർത്തുന്നതിന്റെയും ഉദ്ഘാടനം ഇന്ന് ഉച്ച ഒരു മണിക്ക് ആരോഗ്യവകുപ്പ് മന്ത്രി വീണ ജോർജ് നിർവഹിക്കും. ചടങ്ങിൽ എം.വിജിൻ എം.എൽ.എ അദ്ധ്യക്ഷത വഹിക്കും.

നാഷണൽ ഹെൽത്ത് മിഷൻ പദ്ധതിയിൽ ഉൾപ്പെടുത്തി 1.22 കോടി രൂപ ചിലവിലാണ് സ്റ്റാഫ് ക്വാർട്ടേഴ്‌സ് നിർമ്മാണം പൂർത്തിയാക്കിയത്. ബെഡ് റൂം, ലിവിംഗ് റൂം, അടുക്കള, ടോയ്‌ലറ്റ് എന്നീ സൗകര്യങ്ങളോടെയാണ് ക്വാർട്ടേഴ്‌സ് ഒരുക്കിയിട്ടുള്ളത്. കെൽ ആണ് നിർവഹണ ഏജൻസി.
സംസ്ഥാന സർക്കാറിന്റെ നവകേരള മിഷനിൽ ആർദ്രം ദൗത്യത്തിൽ ഉൾപ്പെടുത്തിയാണ് മാട്ടൂൽ സാമൂഹികാരോഗ്യ കേന്ദ്രത്തെ ബ്ലോക്ക് കുടുംബാരോഗ്യ കേന്ദ്രമായി ഉയർത്തിയത്. ഇതിന്റെ ഭാഗമായി 37.50 ലക്ഷം രൂപ ചിലവിൽ നവീകരണ പ്രവർത്തനങ്ങൾ നടത്തി. എച്ച്.എൽ.എൽ ആണ് നിർവഹണ ഏജൻസി.

സ്വയം തൊഴിൽ പദ്ധതി

എംപ്ലോയ്മെന്റ് എക്സ്ചേഞ്ചിന്റെ മൾട്ടി പർപ്പസ് ജോബ് ക്ലബ് സ്വയം തൊഴിൽ പദ്ധതിക്കായി മട്ടന്നൂർ എംപ്ലോയ്മെന്റ് എക്സ്ചേഞ്ചിൽ പേര് രജിസ്റ്റർ ചെയ്ത ഉദ്യോഗാർഥികളിൽ നിന്ന് അപേക്ഷ ക്ഷണിച്ചു. വായ്പ തുക പത്ത് ലക്ഷം വരെയും സബ്സിഡി 25 ശതമാനവുമാണ്. പ്രായപരിധി 21 നും 45 നും മധ്യേ. നിയമാനുസൃത വയസ്സിളവ് ലഭിക്കും. അപേക്ഷ ഫോറം മട്ടന്നൂർ എംപ്ലോയ്മെന്റ് എക്സ്ചേഞ്ചിൽ ലഭിക്കും. പദ്ധതികളെക്കുറിച്ച് അറിയാൻ 0490-2474700 നമ്പറിൽ ബന്ധപ്പെടാം.

ഓഫ്സെറ്റ് പ്രിന്റിംഗ് ടെക്നോളജി

സാങ്കേതിക വിദ്യാഭ്യാസ വകുപ്പും കേരള സ്റ്റേറ്റ് സെന്റർ ഫോർ അഡ്വാൻസ്ഡ് പ്രിന്റിങ് ആന്റ് ട്രെയിനിംഗും സംയുക്തമായി നടത്തുന്ന പ്രിന്റിംഗ് ടെക്നോളജി സർട്ടിഫിക്കറ്റ് കോഴ്‌സിലേക്ക് അപേക്ഷ ക്ഷണിച്ചു. സി-ആപ്റ്റിന്റെ കോഴിക്കോട് സബ്സെന്ററിലാണ് ഒരു വർഷത്തെ കോഴ്‌സുകൾ. എസ്.എസ്.എൽ.സി, പ്ലസ് ടു/ വി.എച്ച്.എസ.്ഇ/ഡിപ്ലോമ അഥവാ തത്തുല്യ യോഗ്യത വേണം. പട്ടികജാതി/പട്ടികവർഗ/മറ്റ് അർഹരായ വിഭാഗക്കാർക്ക് നിയമാനുസൃത ഫീസ് ആനുകൂല്യം ലഭിക്കും. ഒബിസി/എസ്ഇബിസി/മുന്നോക്ക സമുദായങ്ങളിലെ സാമ്പത്തികമായി പിന്നോക്കം നിൽക്കുന്ന വിദ്യാർഥികൾക്ക് വരുമാന പരിധിക്ക് വിധേയമായി ഫീസ് ആനുകൂല്യം ലഭിക്കും.

അപേക്ഷാ ഫോറം 100 രൂപയക്ക് നേരിട്ടും 135 രൂപക്ക് തപാലിൽ ഓഫീസർ ഇൻ ചാർജ്, സി-ആപ്റ്റ്, റാം മോഹൻ റോഡ്, മലബാർ ഗോൾഡിന് സമീപം, കോഴിക്കോട് വിലാസത്തിൽ ലഭിക്കും. ഫോൺ; 0495 2723666, 0495 2356591, 9400453069, www.captkerala.com. അപേക്ഷ ഒക്ടോബർ 15 നകം ലഭിക്കണം.

കുടിശ്ശിക ഡിസംബർ 30 വരെ ഒടുക്കാം

കേരള മോട്ടോർ തൊഴിലാളി ക്ഷേമനിധി ബോർഡിൽ അംഗത്വമെടുത്ത തൊഴിലാളികൾക്ക് നിബന്ധനകൾക്ക് വിധേയമായി (9% പലിശ സഹിതം) അവസാന മൂന്ന് വർഷ കാലയളവ് വരെയുള്ള (കോവിഡ് കാലയളവ് ഒഴികെ) കുടിശ്ശിക ഡിസംബർ 30 വരെ ഒടുക്കാം. എല്ലാ തൊഴിലാളികളും ഈ അവസരം പരമാവധി പ്രയോജനപ്പെടുത്തണമെന്ന് ജില്ല എക്സിക്യുട്ടിവ് ഓഫിസർ അറിയിച്ചു. ഫോൺ:0497 2705197

പാരമ്പര്യേതര ട്രസ്റ്റി നിയമനം

പയ്യന്നൂർ കാങ്കോൽ വില്ലേജിലെ കാളീശ്വരം ശ്രീ ശിവക്ഷേത്രത്തിൽ അഞ്ച് പാരമ്പര്യേതര ട്രസ്റ്റിമാരുടെ നിയമനത്തിന് അപേക്ഷ ക്ഷണിച്ചു. അപേക്ഷകൾ മലബാർ ദേവസ്വം ബോർഡ്, കാസർകോട് ഡിവിഷൻ നീലേശ്വരത്തുള്ള അസി. കമ്മീഷണറുടെ ഓഫീസിൽ ഒക്ടോബർ 23 ന് വൈകുന്നേരം അഞ്ചിനകം ലഭിക്കണം. നീലേശ്വരത്തുള്ള അസി. കമ്മീഷണറുടെ ഓഫീസ്, തളിപ്പറമ്പ് ഇൻസ്‌പെക്ടറുടെ ഓഫീസ്, മലബാർ ദേവസ്വം ബോർഡ് വെബ് സൈറ്റ് എന്നിവിടങ്ങളിൽ നിന്നും അപേക്ഷ ഫോറം സൗജന്യമായി ലഭിക്കും.

താൽക്കാലിക ഒഴിവ്

ജില്ലയിലെ ഒരു സർക്കാർ സ്ഥാപനത്തിൽ മെഡിക്കൽ റെക്കോർഡ് ലൈബ്രേറിയൻ തസ്തികയിൽ ഒരു താൽക്കാലിക ഒഴിവുണ്ട്. യോഗ്യത: പ്ലസ് ടു അല്ലെങ്കിൽ തത്തുല്യം, ആറുമാസത്തിൽ കുറയാത്ത കാലാവധിയുള്ള ഇന്ത്യാ ഗവ. നടത്തുന്ന മെഡിക്കൽ റെക്കോർഡ് ടെക്‌നീഷ്യൻ കോഴ്‌സ് സർട്ടിഫിക്കറ്റ് (എംആർടി) അല്ലെങ്കിൽ കേരള യൂണിവേഴ്‌സിറ്റി ഓഫ് ഹെൽത്ത് സയൻസ് (കെയുഎച്ച്എസ്) അംഗീകരിച്ച മെഡിക്കൽ റെക്കോർഡ് ലൈബ്രേറിയൻ കോഴ്‌സ് അല്ലെങ്കിൽ തിരുവനന്തപുരത്തെ ശ്രീചിത്ര തിരുനാൾ ഇൻസ്റ്റിറ്റ്യൂട്ട് ഫോർ മെഡിക്കൽ സയൻസ് ആന്റ് ടെക്‌നോളജിയുടെ മെഡിക്കൽ റെക്കോർഡ് സയൻസിൽ ഡിപ്ലോമ. പ്രായപരിധി 41 വയസ്സ്. അസ്സൽ സർട്ടിഫിക്കറ്റുകളുമായി അതത് എംപ്ലോയ്‌മെന്റ് എക്‌സ്‌ചേഞ്ചുകളിൽ ഒക്ടോബർ 15 നകം പേര് രജിസ്റ്റർ ചെയ്യണം.

താലൂക്ക് വികസന സമിതി യോഗം ഒക്ട: അഞ്ചിന്

കണ്ണൂർ താലൂക്ക് വികസന സമിതി യോഗം ഒക്ടോബർ അഞ്ചിന് രാവിലെ 11 ന് താലൂക്ക് ഓഫീസ് കോൺഫറൻസ് ഹാളിൽ ചേരും.

ടെണ്ടർ ക്ഷണിച്ചു

കണ്ണൂർ ഗവ.എഞ്ചിനീയറിംഗ് കോളേജിന്റെ മെയിൻ ബിൽഡിംഗ് ബ്ലോക്ക് അറ്റകുറ്റപണി ചെയ്യുന്നതിന് ടെണ്ടർ ക്ഷണിച്ചു. ടെണ്ടർ സ്വീകരിക്കുന്ന അവസാന തീയതി ഒക്ടോബർ 15 ന് വൈകുന്നേരം നാല് മണി വരെ. ഫോൺ: 0497 2780227 .

ക്വട്ടേഷൻ ക്ഷണിച്ചു

കണ്ണൂർ ഗവ.എഞ്ചിനീയറിംഗ് കോളേജ് ക്യാമ്പസിലെ ചുറ്റുമതിൽ തകർന്ന ഭാഗം അറ്റകുറ്റപ്പണി ചെയ്യുന്നതിന് (സാധന സാമഗ്രികൾ ഉൾപ്പെടെ) ക്വട്ടേഷൻ ക്ഷണിച്ചു. അവസാന തീയതി ഒക്ടോബർ 22 ഉച്ചക്ക് രണ്ട് മണി വരെ.ഫോൺ:0497 2780227 .

പ്രശ്നോത്തരി-ജില്ലാതല മത്സരം

ഗാന്ധി ജയന്തി വാരാഘോഷത്തോടനുബന്ധിച്ച് കേരള ഖാദി ഗ്രാമ വ്യവസായ ബോര്‍ഡ് ഹൈസ്‌കൂള്‍, ഹയര്‍ സെക്കണ്ടറി തലത്തില്‍ നടത്തുന്ന പ്രശ്നോത്തരി മത്സരം ഒക്ടോബര്‍ 15 ന് രാവിലെ 10 ന് കണ്ണൂര്‍ സൗത്ത് ബസാര്‍ അശോക ഹോസ്പിറ്റലിനു മുന്‍വശം ഗുരുഭവന്‍ ഹാളില്‍ നടത്തും. മഹാത്മ ഗാന്ധിയും ഖാദിയും സ്വാതന്ത്ര്യ സമരവും എന്ന വിഷയത്തിലാണ് ജില്ലാതല ക്വിസ്സ് മത്സരം നടത്തുന്നത്. ഒരു സ്‌കൂളില്‍ നിന്നും എട്ടാം ക്ലാസ് മുതല്‍ പന്ത്രണ്ടാം ക്ലാസുവരെയുള്ള വിഭാഗത്തിലെ രണ്ട് കുട്ടികളെ ഉള്‍പ്പെടുത്തി പ്രിന്‍സിപ്പലിന്റെ സാക്ഷ്യപ്പെടുത്തലോടുകൂടി മത്സരത്തില്‍ പങ്കെടുക്കാം. താത്പര്യമുള്ളവര്‍ ഒക്ടോബര്‍ 14 ന് മൂന്ന് മണിക്കകം 0497 270057, 9496133760 നമ്പറുകളിലോ poknr@kkvib.org ഇ മെയില്‍ വിലാസത്തിലോ അറിയിക്കണം. ഒക്ടോബര്‍ 15 ന് രാവിലെ 9.30 ന് ബന്ധപ്പെട്ട വിദ്യാലയങ്ങളുടെ മേലധികാരിയുടെ സാക്ഷ്യപത്രം സഹിതം രജിസ്ട്രേഷന് ഹാജരാകണം. സംസ്ഥാനതല മത്സരം തിരുവനന്തപുരത്ത് നടക്കും.

റാങ്ക് പട്ടിക റദ്ദായികണ്ണൂര്‍ ജില്ലയില്‍ വിദ്യാഭ്യാസ വകുപ്പില്‍ ഫിസിക്കല്‍ എഡ്യൂക്കേഷന്‍ ടീച്ചര്‍ (ഹൈസ്‌കൂള്‍) (ഫസ്റ്റ് എന്‍ സി എ – എല്‍സി /എ വണ്‍) (കാറ്റഗറി നമ്പര്‍: 426/2020) തസ്തികയുടെ 2023 മാര്‍ച്ച് ഒന്നിന് നിലവില്‍ വന്ന റാങ്ക് പട്ടിക  2023  ജൂണ്‍ ഒന്നിന് റദ്ദാക്കിയതായി പി.എസ്.സി ജില്ലാ ഓഫീസര്‍ അറിയിച്ചു.

കണ്ണൂര്‍ ജില്ലയില്‍ വിദ്യാഭ്യാസ വകുപ്പില്‍ പാര്‍ട്ട് ടൈം ഹൈസ്‌കൂള്‍ ടീച്ചര്‍ (സംസ്‌കൃതം) (ഫസ്റ്റ് എന്‍സിഎ- എസ് ഐ  യു സി എന്‍) (കാറ്റഗറി നമ്പര്‍: 455/2020) തസ്തികയുടെ തെരഞ്ഞെടുപ്പിനായി 2021 സെപ്റ്റംബര്‍ ആറിന്  നിലവില്‍ വന്ന 315/2021/എസ് എസ് വി നമ്പര്‍ റാങ്ക് പട്ടിക 2021 ഡിസംബര്‍ 13  അര്‍ദ്ധരാത്രി പ്രാബല്യത്തില്‍ റദ്ദാക്കിയതായി പി.എസ്.സി ജില്ലാ ഓഫീസര്‍ അറിയിച്ചു.

തെരഞ്ഞെടുപ്പ് നടപടികള്‍  റദ്ദാക്കി

കണ്ണൂര്‍ ജില്ലയില്‍ പൊതു വിദ്യാഭ്യാസ വകുപ്പില്‍ പാര്‍ട്ട് ടൈം ഹൈസ്‌കൂള്‍ ടീച്ചര്‍ (അറബിക്) (XIth എന്‍സിഎ-എസ് ടി) (കാറ്റഗറി നമ്പര്‍. 227/2024) തസ്തികയിലേക്ക് 2024 ജൂലൈ 15 ലെ ഗസറ്റ് വിജ്ഞാപന പ്രകാരം യോഗ്യരായ ഉദ്യോഗാര്‍ത്ഥികള്‍ ലഭ്യമല്ലാത്തതിനാല്‍ പ്രസ്തുത വിജ്ഞാപന പ്രകാരമുള്ള തെരഞ്ഞെടുപ്പ് നടപടികള്‍ റദ്ദാക്കിയതായി പി.എസ്.സി ജില്ലാ ഓഫീസര്‍ അറിയിച്ചു.

സ്ത്രീ രചനകളിലെ വൈവിദ്യങ്ങളുമായി നിശാഗന്ധി മാസിക രണ്ടാം പതിപ്പ്

ജെന്‍ഡര്‍ പ്രവര്‍ത്തന ഭാഗമായി ജില്ലയിലെ കുടുംബശ്രീ പ്രവര്‍ത്തകരുടെ സര്‍ഗ്ഗാത്മക രചനകളെ പ്രോത്സാഹിപ്പിക്കുന്നതിനായി തുടങ്ങിയ നിശാഗന്ധി മാസികയുടെ രണ്ടാം പതിപ്പ് ജില്ലാ പഞ്ചായത്ത് ക്ഷേമ കാര്യ സ്റ്റാന്‍ഡിങ് കമ്മിറ്റി ചെയര്‍മാന്‍ വി കെ സുരേഷ് ബാബു പ്രകാശനം ചെയ്തു. നിശാഗന്ധിയിലെ എഴുത്തുകാരും പ്രവര്‍ത്തകരുമെല്ലാം സ്ത്രീകള്‍ ആണെന്നതാണ് മാസികയുടെ പ്രത്യേകത. ഇതിനോടകം നിരവധി നിരൂപക പ്രശസ്തിയും വായനക്കാരും നിശാഗന്ധിയെ തേടി എത്തിയിട്ടുണ്ട്. 33 സ്ത്രീ എഴുത്തുകാരുടെ കവിതകള്‍, കഥ, സിനിമാസാഹിത്യ നിരൂപണങ്ങള്‍ എന്നിവയുമായാണ് രണ്ടാം പതിപ്പ് എത്തുന്നത്. കുടുംബശ്രീ ജില്ലാ മിഷന്‍ ഓഫീസ് ആസ്ഥാനത്ത് നടന്ന പരിപാടിയില്‍ ജില്ലാ മിഷന്‍ കോര്‍ഡിനേറ്റര്‍ എം.വി ജയന്‍, എഴുത്തുകാരിയും നിശാഗന്ധി പത്രാധിപ സമിതി അംഗവുമായ മീര കോയ്യോട്, എഡിറ്റോറിയല്‍ അംഗങ്ങള്‍, ജില്ലാ മിഷന്‍ ഉദ്യോഗസ്ഥര്‍, സി ഡി എസ്സ് ചെയര്‍പേഴ്സണ്‍മാര്‍, സി.ഡി.എസ്സ് അക്കൗണ്ടന്റ് എന്നിവര്‍ പങ്കെടുത്തു.