കണ്ണൂർ താലൂക്ക് തല തരംമാറ്റൽ അദാലത്ത്: 1542 അപേക്ഷകൾ തീർപ്പാക്കി

ഭൂമി തരംമാറ്റവുമായി ബന്ധപ്പെട്ട അപേക്ഷകൾ സമയബന്ധിതമായി തീർപ്പാക്കുന്നതിനായി ജില്ലയിലെ താലൂക്ക് തല അദാലത്തുകൾക്ക് തുടക്കമായി. കണ്ണൂർ താലൂക്ക് തല അദാലത്ത് ജില്ലാ കളക്ടർ അരുൺ കെ വിജയൻ്റെ നേതൃത്വത്തിൽ കളക്ടറേറ്റ് കോൺഫറൻസ് ഹാളിൽ നടന്നു. കണ്ണൂർ താലൂക്കിലെ ആകെ പരിഗണിച്ച 1911 അപേക്ഷകളിൽ 1542 അപേക്ഷകൾ തീർപ്പാക്കി. ബാക്കിയുള്ളത് 369 അപേക്ഷകളാണ്. ഈ അപേക്ഷകൾ ബന്ധപ്പെട്ട ഉദ്യോഗസ്ഥർ നവംബർ 15നകം തീർപ്പാക്കണം. തളിപ്പറമ്പ താലൂക്ക് അദാലത്ത് ഒക്ടോബർ 26ന് തളിപ്പറമ്പ താലൂക്ക് ഓഫീസ് കോൺഫറൻസ് ഹാളിൽ നടക്കും.

ആഗസ്റ്റ് 31 വരെ ലഭിച്ചതും സൗജന്യമായി അനുവദിക്കേണ്ടതുമായ 25 സെന്റിൽ താഴെയുള്ള ഭൂമി സംബന്ധിച്ച് ഫോറം അഞ്ച്, ഫോറം ആറ് അപേക്ഷകളാണ് അദാലത്തിൽ പരിഗണിച്ചത്.
ഫോറം അഞ്ചിൽ ഡേറ്റാ ബാങ്കിൽ നിന്നും ഒഴിവാക്കുന്നതുമായി ബന്ധപ്പെട്ട അപേക്ഷകളാണ് സ്വീകരിച്ചത്. ഇതിൽ ആകെ കിട്ടിയ 956 അപേക്ഷകളിൽ 624 അപേക്ഷകൾ തീർപ്പാക്കി. ബാക്കി 332 അപേക്ഷകളാണ് ഇനി തീർപ്പാകാനുള്ളത്.

ഫോറം ആറിൽ ഭൂമി തരമാറ്റമായി ബന്ധപ്പെട്ട അപേക്ഷകളാണ് സ്വീകരിച്ചത്. ഇതിൽ സൗജന്യ തരം മാറ്റവുമായി ബന്ധപ്പെട്ട അപേക്ഷകളാണ് അദാലത്തിൽ പരിഗണിച്ചത്. സൗജന്യ തരമാറ്റത്തിന് കിട്ടിയ 955 അപേക്ഷകളിൽ 918 എണ്ണം തീർപ്പാക്കി. ബാക്കിയുള്ളത് 37 അപേക്ഷകളാണ്.

ഉദ്യോഗസ്ഥ തലത്തിലാണ് അദാലത്ത് നടന്നത്. പൊതുജനങ്ങൾ അദാലത്തിൽ നേരിട്ട് എത്താതെ തന്നെ എസ്എംഎസ് മുഖേന ഗുണഭോക്താക്കൾക്ക് വിവരങ്ങൾ ലഭ്യമാക്കുന്ന രീതിയിലാണ് അദാലത്ത് ക്രമീകരിച്ചിരിക്കുന്നത്.

നാറാത്ത് ഗ്രാമപഞ്ചായത്ത് പ്രസിഡന്റ് കെ രമേശൻ, അഴീക്കോട് ഗ്രാമ പഞ്ചായത്ത് പ്രസിഡന്റ് കെ അജീഷ്, അസിസ്റ്റന്റ് കളക്ടർ ഗ്രന്ഥേ സായികൃഷ്ണ, റവന്യൂ റിക്കവറി ഡെപ്യൂട്ടി കളക്ടർ ആർ ശ്രീലത, കണ്ണൂർ ഭൂരേഖ തഹസിൽദാർ എം കെ മനോജ്കുമാർ, കണ്ണൂർ താലൂക്ക് തഹസിൽദാർ സുരേഷ് ചന്ദ്രബോസ്, വില്ലേജ് ഓഫീസർമാർ, കൃഷി ഓഫീസർമാർ, വിവിധ റവന്യൂ ഉദ്യോഗസ്ഥർ എന്നിവർ അദാലത്തിന്റെ ഭാഗമായി.

തലശ്ശേരി താലൂക്ക് അദാലത്ത് നവംബർ രണ്ടിന് തലശ്ശേരി താലൂക്ക് ഗവ. ബ്രണ്ണൻ ഹയർ സെക്കന്ററി സ്‌കൂൾ, തലശ്ശേരിയിലും പയ്യന്നൂർ താലൂക്ക് അദാലത്ത് നവംബർ ആറിന് പയ്യന്നൂർ താലൂക്ക് ഓഫീസ് കോമ്പൗണ്ടിലും ഇരിട്ടി താലൂക്ക് അദാലത്ത് നവംബർ ഏഴിന് ഇരിട്ടി ബ്ലോക്ക് കോൺഫറൻസ് ഹാളിലും നടക്കും.