ഡൽഹിയിൽ കെട്ടിടത്തിൽ തീപിടുത്തം. ഒരാൾ മരിച്ചു; നാല് പേർക്ക് പരിക്ക്
ഡൽഹിയിലെ കിഷൻഗഡ് പ്രദേശത്തെ റെസിഡൻഷ്യൽ കെട്ടിടത്തിൽ തീപിടുത്തം. ഒരാൾ മരിച്ചു. നാല് പേർക്ക് പരിക്കേറ്റു. ആകാശ് മണ്ഡൽ എന്ന പതിനാറുകാരനാണ് മരിച്ചത്. മറ്റു നാല് പേർക്ക് പരിക്കേറ്റിട്ടുണ്ട്. സണ്ണി മണ്ഡൽ എന്ന യുവാവ് ഗുരുതരാവസ്ഥയിൽ ഓൾ ഇന്ത്യ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസിൽ ചികിത്സയിലാണ്. കിഷൻഗഡിലെ ഷാനി ബസാർ റോഡിലുള്ള നന്ദ് ലാൽ ഭവനിലാണ് തീപിടിത്തം ഉണ്ടായത്. ഇന്ന് പുലർച്ചെ 3:27ഓടെയായിരുന്നു സംഭവം.
കെട്ടിടത്തിന്റെ നാലാം നിലയിലെ രണ്ട് മുറികളുള്ള ഫ്ലാറ്റിലാണ് തീപിടത്തമുണ്ടായത്. കുടുംബം വാടകയ്ക്ക് താമസിച്ച് വരികയായിരുന്നു. വിവരം ലഭിച്ച ഉടനെ കിഷൻഗഡിലെ സ്റ്റേഷൻ ഹൗസ് ഓഫീസറും സംഘവും സംഭവസ്ഥലത്തെത്തി. പൊലീസ് വാഹനത്തിലാണ് പരിക്കേറ്റവരെ ആശുപത്രിയിൽ എത്തിച്ചത്.തീപിടിത്തം ഉണ്ടായതിന് പിന്നിലെ കാരണം വ്യക്തമല്ല. സിലിണ്ടറിൽ നിന്നുള്ള ചോർച്ചയാകാം കാരണമെന്ന് ആദ്യം കരുതിയെങ്കിലും പരിശോധനയിൽ സിലിണ്ടർ സുരക്ഷിതമാണെന്ന് കണ്ടെത്തി. തീ നിയന്ത്രണ വിധേയമാക്കിയിട്ടുണ്ട്. വീട്ടിലുണ്ടായിരുന്ന സാധനങ്ങളെല്ലാം കത്തിനശിച്ചിട്ടുണ്ട്. ഫോറൻസിക് സംഘം സംഭവസ്ഥലത്തെത്തി പരിശോധന നടത്തും.
About The Author
